Македонската претставничка Ева Величковска го имаше своето прво официјално претставување на Мис на светот 2026, чие јубилејно 75. издание вчера свечено беше отворено во заливот Халонг во Виетнам.
Дваесетгодишната Ева е меѓу претставничките од 106 земји и територии, а по отворањето сподели фотографии од свечената вечер.
„Вечерта на отворањето на ‘Мис на светот’. Каква вечер!“, напиша таа.
За првиот дел од церемонијата, Величковска се појави во традиционалната виетнамска облека ао даи.
Таа носеше впечатлива креација во жолто-златна нијанса со цветни мотиви, а изгледот го надополни со традиционална конусна шапка.
Подоцна Ева се претстави и во гламурозен долг фустан, богато украсен со светкави камења и кристални детали.
На свеченото отворање кандидатките беа поединечно претставени пред публиката, а вечерта беше збогатена со музички и уметнички настапи посветени на виетнамската култура. На крајот, сите учеснички продефилираа во вечерни фустани, а спектаклот заврши со огномет над заливот Халонг.
Ева Величковска има 20 години и е студентка на Славјанскиот универзитет во Скопје.
