Пејачот Дино Мерлин ретко зборува за својот приватен живот, но неодамна, на еден негов настап, откри детали од младоста и врската со сопругата Амела Дервишхалидовиќ, со која е во брак веќе неколку децении.
Имено, Мерлин ја раскажа вистинската приказна зад песната „Први плес“, која ја напишал токму за својата сопруга.
– Беше многу талентирана, за разлика од мене. Но, кога бевме млади, не сите беа за нашиот брак и моравме да побегнеме. Немавме пари ни за свадба, па не ѝ овозможив да го има тој прв танц. Со години ме печеше совеста, па ѝ предлагав да се венчаме повторно, сега на стари години. Но таа рече: „Нема збор!“ Беше скромна. И што можев? Најдобро што знам – ѝ напишав песна. Ова е вистинска приказна, за тој прв танц што никогаш не го изигравме – откри Дино.
Пејачот минатата година заврши во болница, откако му се слоши, но неговиот тим увери дека се чувствува добро. Наскоро потоа се врати на сцената и продолжи да работи на новиот албум, кој неодамна беше објавен.
Во едно интервју, Мерлин отворено зборуваше и за периодот кога се борел со тешка депресија.
– Во еден период од животот бев тешко болен. Имав многу тешка депресија. Не би ѝ посакал на никого. Станав незаинтересиран за сè – ни за живот, ни за смрт. Едноставно бев како растение. Тоа беше момент кога сакав да се откажам од музиката. Мислев на разни работи… но, ете, со некое чудо, успеав да се извлечам – изјави Дино за ХРТ.
