Игор Џамбазов вели дека за него како „красти“ се лепеле луѓе кои во нормални околности не би сакале да бидат во иста просторија со него.
Познатиот актер, шоумен и писател во Еден на Еден кај Жаре изјавил дека успеал да смени многу навики, и да се тргне од луѓето кои го искористувале.
– Тоа е една од оние навики кои успеав да ги поправам. Да не им давам шанса на небитни луѓе да бидат дел од мојот живот. И уште мојата кариера да зависи од нивните постапки, и уште да им давам добар дел од мојата заработка. На плеќите тоа ми тежеше, сите тоа го гледаат, само јас не признавав – изјави Игор во Еден на Еден која ќе се емитува во недела, од 18.30 на Канал 5.
За првпат во ТВ емисија, тој ќе се појави заедно со Илина Арсова, и ќе ја раскажат целата нивна љубовна приказна.
– Јас не верувам во Господ, верувам во судбина, и судбината ми ја прати. Имам грижа на совест, зашто 95 проценти од луѓето оваа година ќе ја паметат како нешто најлошо, а јас како година која ми го донела најубавото нешто што можело да ми се случи. Не очекував дека некој толку ќе ме загрее. Имам една нова песна, љубовна. Тоа не е љубовна песна, тоа е „зацопана“ песна. А, се „зацопуваат“ тинејџери. Тоа ме подисплаши, само заради годините – му открил Џамбазов на Жаре.
