Иако поради коронавирусот годинава сите свадби беа одложени, не значи дека младите невести треба да се откажат од сонот да бидат најубави на венчалниот ден.
„Љубовта секогаш победува, без разлика какви пречки се пред неа. Тоа е нагласено во нашата колекција од невестински фустани за пролет/лето 2021, кои се за сите модерни невести“ – стои во соопштението од модната куќа „Оскар де ла Рента“.
Според модните критичари, креативните директори Лора Ким и Фернандо Гарсија се надминале себеси со колекцијата. Нивните романтични фустани се за сите самоуверени жени кои сакаат да бидат забележени. Тоа се модерни, софистицирани фустани кои ја истакнуваат женственоста.
Фустанот со свилена органза со пердуви бил изработен за 1.600 часа, со сложена конструкција и посебна „ари“ техника за везење, која потекнува од Индија.
Едноставниот долг фустан станува неодолив со шалот изработен од нежни цветни ливчиња рачно шиени во големи цветови.
Колекцијата нуди драматични и гламурозни дизајни со деликатна изработка, што ги прави нежни и романтични. Дури и едноставните фустани без прерамки и други детали воодушевуваат со долниот волуминозен асиметричен дел.
„Венчалните фустани од новата колекција креирани се за идните невести кои знаат што сакаат. Колекцијата ги поврзува вечната љубов, убавината и оптимизмот“- се наведува во соопштението.
