Во обид да го уништи коронавирусот, властите со трактори ја испрскалe два километра долгата плажа Захара де лос Атунес во Шпанија, со раствор од белило, еден ден пред шпанската влада и официјално да им дозволи на децата да излезат надвор од домовите, пишува Гардијан.
Со тоа не само што не успеале во својата намера, туку со овој непромислен потег, тие му нанеле огромна штета на локалниот екосистем.
Fumigar con lejía playas en plena época de cría de aves o de desarrollo de la red de invertebrados que sustentarán la pesca costera y destrozar el valor turístico del litoral, no es una de las ideas de Trump. Está ocurriendo en Zahara de los Atunes ?https://t.co/afCFLg1sVG
— Greenpeace España (@greenpeace_esp) April 27, 2020
Откако веста стигнала до екологистите, тие излегле на самото место и констатирале дека била направена огромна штета и уверени се дека на тој начин се уништени голем број растенија и инсекти.
Екологистите велат дека овој потег му нанел „голема штета“ на локалниот екосистем.
Марија Долорес Инглесијас, портпаролка на волонтерското здружение за заштита на околината во регионот на Кадиз, во изјава дадена за медиумите рекла дека ја посетила плажата и е навистина згрозена од она што го видела таму.
– Белилото уништило сѐ на површината на плажата. Ништо не се гледа, дури и инсектите умреле – рекла таа.
Штетата од „дезинфицирањето со белилото“ е дотолку поголема што според тамошните еколози, плажата била заштитено место за размножување на птиците преселници.
– Видов најмалку едно гнездо на птици во кое имаше јајца што беа комплетно уништени бидејќи низ нив поминувале тракторите што ја вршеле „дезинфекцијата“ – заклучила Марија.
Инаку, Шпанија е тешко погодена од коронавирусот и досега починаа 23.800 лица. Владата неодамна најави план за попуштање на мерките во четири фази и враќање во „нова нормала“ кон крајот на јуни.
