Легендарниот гитарист Кит Ричардс оваа година ќе наполни 77 години, а како што пренесуваат американските медиуми, славниот рокер донел многу важна одлука – престанува со пушење!
Гитаристот на „Rolling stones“ со децении наназад се водеше по познатата парола – „секс, дрога, рокенрол“, а пред големата американска турнеја која „Rolling stones“ ја почнуваат во мај оваа година, тој одлучил да стави крај на својот најголем порок – цигарите.
– Да се одвикнете од никотин е потешко отколку да прекинете да земате хероин – рече Кит во 2018 година.
Турнејата на популарните Стонси беше планирана за минатата година, меѓутоа таа е одложена поради здравствените проблеми со кои се соочуваше 76-годишниот фронтмен Мик Џегер.
За потсетување, Џегер кон почетокот на април 2019 година имаше операција на срцето. Тој целосно се опорави и продолжи со секојдневните обврски.
Инаку, турнејата опфаќа вкупно 10 американски градови. Џегер и Ричардс им ветија на обожавателите концерти за паметење, а интересно е тоа што тие двајцата заедно имаат 152 години!
