Александра Јанева која многумна ја нарекуваат девојка со ангелски глас вечерва настапува на ,,Макфест”. Победничката на Макфест 2016 и со право кажано – гордоста на струмичани, ни открива детали за вечерашниот настап.
Во екот на финалните подготовки , како се чувствуваш?
– Возбудата секогаш е присутна кога се промовира нова песна. Поготово, кога после 5 години се враќаш на фестивалската сцена и публиката која ти го дала првото признание и поддршка, чувствуваш поголема одговорност.
Со каква композиција ќе се претставиш на публиката?
– Денот што ни носи…Песната е тотално јас. Премногу емотивна, тешка балада.
Разделбите со блиските се нешто што најтешко ми паѓа. Ќе го почувствувате тоа дури ја слушате.
Инаку, песната живее и се слуша на моите „гаџети“ веќе подолго време и едвај чекамда ја слушнат сите, многу ми е драга.
Што очекуваш од себе и настапот на ,, Макфест”?
– Макфест е првиот фестивал на кој што настапив. Таа слика од дебитантот на големата сцена секогаш ми буди слатки спомени и со насмевка ги дочекувам сите нови изданија.
Иако се сметам себеси за „overthinker’, овој пат не се оптоварувам со мисли и очекувања. Знам само едно, тука сум за да ја споделам емоцијата со публиката. Да ја пренесам песната и нејзината приказна во полн ефект, да ги допре нивните срца. (се смее, н.з).
Сама на сцена или со некаква сценска точка?
– Александра е сама, но само визуелно. Хаосот во мислите ќе ја придружува низ целата песна. (радосна е, н.з).
Кој ќе се погрижи за твојот изглед?
– Како и досега, комплетно се препуштам на тимот што ме познава најдобро. Стајлингот го осмисли Милена Танаскоска, а за шминка и фризура ќе се погрижи Драган Гоцев.
Какво е чуството после две победи на најеминентниот македонски фестивал, повторно да учествуваш?
– Притисок не чувствувам од другите, туку знам самата на себе да си го направам, барајќи ја најдобрата верзија од себе. Одговорност и предизвик е да се надминам себеси, сега и со секој нареден проект.
Те плаши ли конкуренцијата или напротив, те охрабрува?
– Имав прилика да слушнам неколку песни и сите беа пријатни за слушање, модерни и песни кои уште утре би си ги ставила во плејлиста. Многу се радувам на нова македонска музика! (радосна е, н.з).
