Србија од 1 ноември повеќе нема да добива нафта од Русија поради санкциите. Црното злато повеќе нема да и се доставува на земјава со танкери преку Јадранско Море, а подоцна и со нафтовод низ Хрватска, изјави претседателот Александар Вучиќ, обраќајќи им се на граѓаните.
„Што ќе правиме со струја, нафта? Од 1 ноември за нас нема да има руска нафта, ќе бидеме под санкции“, ги цитира Риа Новости зборовите на српскиот лидер.
Според Вучиќ, Србија бара алтернативни суровини. На крајот на јули, српскиот претседател најави дека земјата ќе биде во непрогласена вонредна состојба во следните осум месеци поради светската криза и нејзиното влијание врз снабдувањето со енергија. Тој истакна дека ситуацијата во државата е најтешка во последните десет години.
