Изборната комисија на Филмскиот центар на Србија одлучи филмот „Мрак“ на Душан Милиќ да биде кандидат на Србија во трката за 95-тото доделување на наградата на Американската академија за филмски уметности и науки, во категоријата за најдобар меѓународен филм.
– Филмот „Мрак“ следи неколку дена од животот на едно семејство во изолирана и незаштитена енклава на Косово и Метохија. Со тензична атмосфера, вешт кинематографски јазик и елементи на хорор, филмот нè воведува во светот на страв и неизвесност, во кој три генерации од едно семејство се обидуваат да задржат привид на нормален живот. Поради силните емоции, универзалноста на темата и ликовите, комисијата верува дека филмот успешно ќе комуницира со меѓународната публика и членовите на Американската академија за филмски уметности и науки, се вели во образложението на Комисијата во изборот на „Мрак“.
Претстојната 95-та церемонија на доделувањето на оскарот ќе се одржи во Лос Анџелес на 12 март 2023 година.
