Јахтата на Владимир Путин, „Graceful“ е видена во движење седум месеци откако ја напушти Германија и влезе во пристаништето Калининград. Јахтата вредна 119 милиони долари и долга 81 метар е забележана како плови покрај брегот на Естонија. Фотографијата е направена од Карл Грол, фотограф на веб-страницата TheYachtPhoto.com и споделена со новинарите на Форбс. Првото нешто што е забележано на фотографијата е дека „Graceful“ го променила името и сега се вика „Косатка“, што на руски значи „кит убиец“.
Јахтата патувала на север во Балтичкото Море, западно од естонскиот остров Сааремаа. Според доказите на фотографијата, „Косатка“ била придружувана од брод на руската вооружена крајбрежна стража. Се претпоставува дека јахтата патувала кон Санкт Петербург. Не се знае ниту кога го сменила името, ниту кога отпловила од Калининград. Нејзиниот транспондер бил исклучен најмалку од 30 авгус, според службата за следење на бродови Marine Traffic.
„Косатка“ е луксузна јахта регистрирана во Русија. Има внатрешен базен кој може да се претвори во подиум за танцување или театар, апартмани за 12 гости и сопствен апартман со винарска визба во која може да се сместат до 400 шишиња.
Косатка отплови од германското пристаниште Хамбург на 7 февруари, каде што беше на поправка во бродоградилиштето на компанијата Blohm + Voss која ја изградила. Јахтата испловила седумнаесет дена пред руските трупи да ја нападнат Украина. На 2 јуни, американското Министерство за финансии ги санкционираше „Graceful“ и три други јахти поврзани со рускиот претседател.
