Готвачот Џејми Оливер прави емисија додека е во карантин! (ФОТО)

Омилениот кувар на многумина, Џејми Оливер, ги запраша своите пријатели на Фејсбук што би можел да направи за нив, бидејќи и Британците минатата недела се придружија на остатокот од светот кој е затворен во изолација и карантин. Не требаше да чека долго време одговор, луѓето многу јасно и прецизно кажаа што сакаат од него – едноставни рецепти кои можат да се направат брзо, користејќи намирници што веќе ги имаат, но и да им понуди идеални решенија за јадења кои можат да се замрзнат. За помалку од 7 дена Џејми го направи тоа што се бараше од него. Всушност, за само 3 дена сними серија од 5 епизоди, а првата ја објави во понеделникот.

Џејми новата серија ја нарече „Jamie: Keep Cooking and Carry On”, што е игра на зборови на познатата британска реченица „Keep Calm and Carry On”. Токму и како тие мотивациски зборови кои на плакати од владата за време на Втора Светска војна во 1939 година се прошириле низ земјата, така Џејми сега сака да им ја олесни изолацијата на своите сограѓани. А, благодарение на интернетот и англискиот јазик, рецептите може да ги разбере и поголем дел од светот. Тој објасни дека рецептите се подложни на промени и доколку немате некоја намирница можете да ја замените со тоа што ви е останато во кујна. Исто така, тој сака да покаже и рецепти каде што нема да морате да фрлате ништо, едноставно ќе го замрзнете јадењето.

Лесни и вкусни рецепти се тоа што можете да пронајдете на неговата фејсбук-страна деновиве.