Кардини бил познат италијански готвач кој поради подобра егзистенција ја напуштил својата земја во 1920 година, во потрага за исполнување на американскиот сон. Но, патот од Америка го одвел во Мексико каде отворил и свој ресторан. Во 1924 година ја измислил салатата наречена (по него) Цезар, а всушност таа салата ја приготвувале неговите вработени за да ги услужат побрзо гостите (главно, Американци), пред да им пристигне главното јадење, кои пристигнувале тука за да се забавуваат и да се напијат.
Цезар салатата набрзо станува популарно предјадење кое полека се проширува низ светот. Денес пак, поради богатите состојки кои ги содржи, многумина ја сметаат и за лесен ручек или вечера.
Веројатно сте пробале најразлични Цезар салати, често и мешавини од се и сешто, модерни варијанти, со различни (дури и непотребни) додатоци.
И претпоставуваме, многупати сте се разочарале, зашто не сте го добиле истиот вкус од Цезар салатата која сте ја нарачале неодамна, во некој друг ресторан.
Но разбираме, секој сака да биде оригинален, на свој начин. Сепак, за оние кои сакаат да го вкусат приближно оригиналниот рецепт на кралицата на салатите (земјаќи ги в предвид состојките кои денес можат да се најдат во супермаркетите или на пазарот), тоа веројатно ќе мора да го направат сами, дома.
Од состојки потребни се – 5 изгмечени чешниња лук, 4 лажици маслиново масло, сок од 1 лимон, 2 лажичи (ворчестер) сос, 1 лажица сенф, 1 ипол лажица бел вински оцет, 4 јајца, 2 подебели парчиња домашен леб, 2 лажици маслиново масло, 100 грама пршута, листови марула, 50 грама пармезан, сол, мелен црн пипер.
Подготовка
Исечкајте го лебот на коцки и прелијте го со маслиново масло, посолете и наросете мелен црн пипер. Печете ги парчињата леб 15 минути, додека не поруменат, а потоа оставете ги да се изладат.
Ставете ја пршутата да се пече 3 минути додека не стане крцкава. Изгмечете го лукот со преостанатото маслиново масло и додадете го лимоновиот сок, ворчестер сосот, сенфот и оцетот, па добро промешајте. Потоа во салатата додадете ги ровко сварените жолчки од јајцата и уште еднаш промешајте.
Сервирајте ја Цезар салатата на зачинетите листови марула. Додадете ги коцките леб, пршутата и пармезанот и наросете со мелен црн пипер.
