Иако нема лек за настинка и грип, имаме многу храна, суплементи и хербални препарати кои ги ублажуваат симптомите и го скратуваат времетраењето на болеста. Нутриционистката Сандра Крстев Бараќ ги открива најчестите заблуди и грешки во лекувањето на настинки, грип и вируси.
Настинката е најчеста вирусна болест во светот, која го зафаќа горниот респираторен тракт. Грипот е болест многу слична на настинката, но со многу посилен интензитет на симптоми и подолго траење. Повеќето луѓе ќе ја започнат битката со настинката и грипот со земање мега дози на витамин Ц. Постојат добри докази дека високите дози на витамин Ц (1 -2 g / ден) го скратуваат времетраењето и ги ублажуваат симптомите на обичната настинка. Следствено, снабдувањето на телото со потребната количина на витамин Ц (најмалку 100 mg) дневно е погодно за побрзо закрепнување од болеста. Сепак, прибегнувањето кон мега-дози поголеми од 2 g витамин Ц дневно може да предизвика дијареа, повраќање и вртоглавица и не се препорачува. Помалку познати сојузници против настинка и грип се витамините А и Е и минералите цинк, бакар и селен.
Народна медицина
Народната медицина веќе има добро воспоставена листа на соодветни намирници кои се препорачуваат генерално за зајакнување на имунитетот, но и особено кога веќе се појавила настинка или грип. Листaта ја предводи киселата зелка, која освен што го зајакнува имунолошкиот систем, делува и антисептично на органите за дишење.
Лукот заслужува важно место во исхраната на заболените од настинки и грип бидејќи содржи материи кои помагаат при болки во грлото и инфекции на белите дробови, но корисни се и напитоци од ферментирано млеко бидејќи помагаат во зајакнување на имунолошкиот систем, а особено се препорачува рен: изрендан во млеко или помешан со мед.
Пилешката супа исто така делува ефикасно. Благиот терапевтски ефект на пилешката супа е за ублажување на симптомите на грип и потврден е од модерната наука, па затоа е општо прифатен факт дека пилешката супа има благи антибиотски својства.
Чаевите играат важна улога во лекувањето на настинки и грип. Тие го намалуваат отокот на слузницата на носот и грлото, спречуваат дехидрација и го смируваат воспалението. Сепак, не е сеедно каков вид на чај се користи. Најдобри резултати против симптомите на настинка и грип даваат чаевите од камилица, бозел, равнец и шипка. Со додавање на мед нивниот ефект во ублажување на симптомите на болеста ќе биде уште подобар.
Гастричен вирус
За разлика од стандардниот грип кој го напаѓа респираторниот систем, гастроентритисот или популарно гастричниот вирус вклучува воспаление на желудникот и цревата придружено со повраќање, дијареа и стомачни грчеви. Обично е со многу кратко времетраење, но и со многу интензивни симптоми.
Во случај на гастричен вирус најдобро е желудникот да се одмори без јадење, но во исто време да се надомести изгубената течност и електролити.
Многу корисен е чајот од камилица, шипка и нане.
Хербални препарати
Веројатно најпознат и најпроверен хербален имуностимулант е екстрактот од растението ехинацеа. Го стимулира производството на бели крвни зрнца, особено Т-лимфоцити, кои се главните одбранбени клетки на нашето тело. Доколку се земе веднаш на почетокот на симптомите, ефикасно ги ублажува симптомите на вирусот и го скратува времетраењето на болеста. Помалку познато, но многу ефикасно во намалувањето на симптомите на болеста е растението Pelargonium sidoides.
Тоа е лековито растение од Јужна Африка, богато со фитохемикалии, витамини, минерали и амино киселини.Употребата на неговиот екстракт ги ублажува симптомите на настинка и ја подобрува општата состојба на организмот. Денес на пазарот има многу хомеопатски лекови кои се користат за ублажување на симптомите на настинка и грип. Но, треба да се внимава при земање на вакви препарати и да се консултира стручно лице, бидејќи нивната несоодветна употреба може да биде штетна за здравјето, пишува порталот мис7здрава.
