Градското собрание на Нови Сад го прифати планот за реновирање на Универзитетскиот парк на брегот на Дунав, простор на кој, меѓу другото, ќе се наоѓа и музејот посветен на неодамна починатиот кантавтор Ѓорѓе Балашевиќ.
Градските власти одбиле голем број од предлозите на локалните здруженија на граѓани, кои предложиле и алтернативна локација за музејот, додека барањето на семејството Балашевиќ било делумно прифатено. Имено, семејството Балашевиќ барале и кафуле, продавница за сувенири и 11 соби за сместување на туристи.
(ФОТО) ХРАМ НА ЉУБОВТА: Во Нови Сад ќе се гради несекојдневен музеј посветен на Џоле
Музејот ќе се простира на неколку стотици квадратни метри, а предвидено е да содржи галериски простор, мултимедијална сала и други простории, пренесуваат српските портали.
Голем број здруженија доставиле коментари за планот. Друштвото на архитекти од Нови Сад оценило дека паркот, сместен во зелен појас покрај брегот на Дунав, не треба да се гледа како слободен простор за градба, туку музејот треба да најде место во рамки на веќе изграденото ткиво на градот.
Граѓанските и еколошки здружение на Нови Сад изнеле забелешка според која музејот посветен на кантавторот би требал да се наоѓа во Салајка, делот од градот во кој живеел Балашевиќ и кој е најпознат токму по него.
Но, сите приговори биле одбиени, освен барањето на Фондацијата Балашевиќ, која побарала во објектот да се вклучат и кафуле, продавница за сувенири и 11 соби за туристи. Нивното барање било делумно прифатено.
Во меѓувреме се одржала и презентација на идејното решение на музејот на кое присуствувало семејството Балашевиќ, но и градоначалникот на Нови Сад, Милош Вучевиќ, кој најавил дека градот Нови Сад целосно ќе ја поддржи изградбата на музејот.
Фотографија од претставувањето на идејното решение објавила и сопругата на Балашевиќ, Оливера, која во таа прилика изјавила:
„Музејот како музеј е нешто што е конечно, а секако дека не конечно, зашто Џорџ е наше минато и наша иднина, а ние сме негова сегашност“.
