Разговараме со Наташа Мијат Крстевска, музичарка и контролорка на летање.
Начинот на кој таа ја чувствува музиката и умешноста да пренесе порака, ги допира срцата на сите присутни. Разговараме со Наташа Мијат Крстевска, поп пејачка, кантавтор и контолор на летање за љубовта кон професијата, музиката и уште нешто…
Како падна одлуката да работиш како контролор на летање?
– Сосема случајно. Велат дека понекогаш професијата го наоѓа човекот, а не тој неа. Така беше и во мојот случај. Иако бев тргната во Америка да студирам медицина и завршив втора година, сплет на околности (2001 година), како фамилијарни (прераната смрт на мојот татко), така и политички во нашата земја (меѓуетничкиот конфликт во Македонија), ме донесоа да бидам дома во лето кога конкурсот за контролори на летање беше објавен. Понатаму, процесот на селекција и школувањето е веќе историја. Кога ќе се укотват тркалата во шините, после сами одат нештата.
Дали после 20 години би ја донела истата одлука да го работиш токму тоа?
– Работата ми е супер, погодена на карактерот, дополнително ме има и модифицирано, што на подобро што на полошо, но генерално не се каам што се откажав од медицината за да ѝ се предадам на авијацијата. И оваа професија е постојано динамична, интересна, бара донесување на одлуки секојдневно, кои влијаат на многу човечки животи, што би рекле: одговорност на максимум.
Што е она што те предизвикува во твојата професија?
– Комуникацијата со пилотите. Додека сум на фреквенција, несвесно правам и психолошка евалуација на благосостојбата на пилотот, и гледам како да го приспособам тонот на гласот, векторите, дали повеќе или помалку да комуницирам за да пружам максимално квалитетна услуга. Дали е пилот кој прави испитен лет во војска, или е преморен комерцијален пилот, кој се отепал од летање цел ден и гледа само да слета и дома да си оди, тоа многу ми влијае како ќе се „подесам“ во работењето. Тоа е мојот личен предизвик кога сум на фреквенција.
Кои се негативните страни на твојата професија?
– Mожеби само ноќните смени би ги споменала како негативност, зашто земаат данок врз телото, а можеби и животниот век. Затоа и секоја година имаме задолжителни темелни лекарски прегледи. Доста е комплексно и скапоцено да се „произведе“ контролор на летање, па се трудиме да траеме што подолго.
Колку од друга страна те исполнува музиката?
– Музиката ми е и благослов, лична дефиниција за душевна храна, и неопходност за мојот систем. Без разлика дали сум активна на естрадата или не, музиката е во мене 24/7 и постојано извираат нови песни. Едноставно поради емоционални, семејни или професионални обврски секогаш не ми преостанува време за пласман на музика.
Која ти е поголема љубов, музиката или работата како контолор на летање?
– Кога сум имала девет месеци, на Манов Мост во село Долно Дупени сум проодела кога сум ги чула тапаните од селската свадба. Тоа е тоа. Музиката ме движи и ме прави среќна. Најголем сон како дете ми беше да компонирам музика за цртаните на Дизни. Тогаш не ни знаев дека постои професија како контролор на летање.
Каква е Наташа во секојдневниот живот?
– Ќе мора да ги прашаме блиските околу мене, но генерално „тоа е тоа“, јас сум таа од песните, бидејќи сама ги пишувам музиката и текстот, затоа некоја ако сака вистински да ме познава, ќе треба да чуе и нешто од мојот опус.
Што значи Мијата?
– Мијата зчачи ќерка на Мијат Мијатовиќ, еден прекрасен еминентен езотерик, кој направи големи дела за физиката и астрономијата во Македонија, а кого јас се гордеам да го наречам свој татко.
