Без Зоки Бејбе не би го познале Зоран Ристевски. Без Зоки Бејбе не би го познале ниту Скопје. Со него секоја журка е позабавна, секое радио поинтересно, скопските улици понасмеани.
Радио водител и диџеј, според хронолошкиот ред на избор на професија. Понекогаш едното, понекогаш другото, а во многу периоди и двете истовремено. Како сега, со редовни емисии „Првата убава работа во денот“ на брановите на Радио Бар и „Дим“ на Амок радио и паралелно клупски свирки во повеќе скопски (и не само скопски) клубови. Неодамна го отвори концертот на Каролина Гочева. И со тоа темпо е од неговата дваесетта година. Незапирлив, на точак или на лонгборд, го бои Скопје со музика, со својот колоритен дух и уникатна персона.
Главниот позитивен аспект на твојата личност.
– Искреноста, поинаку за мене е невоспитано.
Како би се опишал некому кој треба да те препознае на „средба на слепо“(blind date) под услов да не е на социјалните мрежи)?
– Диџеј и секс симбол, ахахах.
Кои квалитети ги цениш најмногу кај луѓето?
– Искреноста, лојалноста и емпатичноста.
Со што некој заслужува да стане твој пријател?
– Да е забавна личност е добар старт. За понатаму, здравје.
Што може да биде причина да „ставиш крст“ на некое пријателство?
– Манипулативно, неискрено, агресивно и арогантно однесување.
За што е добра виртуелната реалност на социјалните мрежи?
– Најголемо задоволство во буквална смисла имам доживеано од социјални мрежи каде сите се голи. ахахаха
Твојот главен недостаток/маана.
– Ме мрзи да правам сè што не е моја страст, љубов и опсесија. За сè друго може да се плати помош, но јас немам за тоа да платам, па се мачам хаха.
Твојата идеја за среќата.
– Само кога сум спокоен сум среќен.
Што може да те направи несреќен?
– Неправда, безаконие, простотилак и секако секое омаловажување на маргинилизираните во општеството.
Ако не си овој кој си, кој би сакал да бидеш?
– Буда
Каде/во која земја би сакал да живееш?
– За початок Србија, бидејќи сум роден во Белград и сакам да откријам што тој има за мене и мојот живот да понуди. Не сум престојувал подолго од 3 месеци во него.
Која е твојата омилена музичка деценија?
– Деведесетите и убавината на првата декада на глобалната клупската електронска сцена.
Твојот омилен филм или филмски автор.
– Бертолучи, „Последното танго во Париз“.
Која книга или автор ти оставиле впечаток во последно време?
– Пати Смит – „Дечиња“ или „Just Kids“, какошто е оригинално насловена. Приказна за љубовта на Пати со познатиот американски фотограф Роберт Мепелтроп.
Кога би можел да разговараш со кој и да е човек кога и да е живеел, кој би бил тоа?
– Тој човек не е историјски познат, но мене ми е многу близок, а не сум имал среќа да го запознаам бидејќи не сум бил роден. Починал многу млад, но веќе бил татко на мојата мајка. Со сите други баби и дедовци многу се сакавме.
Моето Скопје е…
– Место каде мојот живот има смисла и каде остварив и доживеав сè што посакав. Во иднина место каде со возбуда и многу љубов ќе се враќам. Така посакувам.
Лонгбордот за тебе е…
– Дел од мене.
Идеалниот ручек е…
– Во Пелистер сам или со пријатели.
Омилено место за одмор.
– Само да има море и плажа и да е септември.
Кафето е…
– Повод за муабет и цигара.
