Протести досега се најавени во Мостар, Сараево и Зеница.
За поддршка на сите жртви на насилство денеска низ Босна и Херцеговина ќе се одржи мирен собир и протестна прошетка.
Мирен протест со почеток во 18 часот на плоштадот Алија Изетбеговиќ во Зеница се организира по повод неодамнешното повеќекратно убиство во Градачац каде Нермин Сулејмановиќ уби три лица, по што рани исто толку и на крајот се самоуби.
Време е да се каже: „Стоп за насилството и стоп за фемицидот во оваа земја“, се наведува во најавата за мирен собир на социјалните мрежи, што го организира Емина Бабиќ, советничка во Градскиот совет на градот Зеница, пренесуваат босанските медиуми.
Протести и во Мостар и Сараево
Иницијативата на граѓаните на Мостар организира мирна протестна средба на граѓаните на Мостар денеска во 18 часот на шпанскиот плоштад во Мостар.
Како што наведуваат во соопштението, со овие мирни протести се обидуваат да го свртат вниманието на јавноста кон проблемот со фемицидот, насилството врз жените, но сакаат да ги изнесат и барањата упатени до сите носители на власт.
„Бараме доследна примена на Законот и во случаите кога ќе настапи смрт како последица на семејно насилство, на сторителот да му се суди според одредбите од Законот, со што ќе се утврди построга казна“, бараат граѓаните.
Во исто време, мирен протест се организира и во Сараево. А самата градоначалничка на Сараево ги повика граѓаните да се придружат на протестот.
