Откако го распродаде првиот закажан концерт во Белградската арена за исклучително краток временски период, хрватската музичка сензација Јаков Јозиновиќ го најави својот втор солистички концерт на истото место.
Првиот концерт ќе се одржи на 24 октомври, а поради огромниот интерес на публиката, пејачот ќе одржи концерт и еден ден подоцна, на 25 октомври.
Веста за новиот датум ја сподели на социјалните мрежи, не криејќи го воодушевувањето од реакциите на фановите.
„Драги луѓе, ви благодарам за рекордно распродадената Арена. Немам што друго да кажам освен да се видиме и втората вечер“, им порачал Јозиновиќ на своите следбеници.
Младиот пејач додал и дека сака сите негови обожаватели да успеат да обезбедат билети за концертот. Билетите за вториот датум ќе бидат пуштени во продажба в четврток, 21 мај, напладне.
Да потсетиме дека по 10 распродадени концерти во Сава Центар во Белград оваа пролет, Јозиновиќ го најави најголемиот солистички концерт во неговата кариера во Србија. Продажбата на билети за спектаклот со сцена поставена во форматот „Арена 360°“ започна во понеделникот напладне, а интересот на публиката ги надмина очекувањата на организаторите.
Иако концертната арена во Белград собира речиси 19.000 луѓе, во еден момент околу 44.000 луѓе чекаа во виртуелен ред. Поради огромната побарувачка, целата Арена беше распродадена за само неколку часа.
„Белградската арена се распродаде за неколку часа! Луѓе, што е ова? Ви благодарам од срце, едвај чекам да пееме нови песни заедно“, напиша Јаков на Инстаграм.
Освен во Србија, Јозиновиќ во последните месеци имаше голем успех и во други градови од регионот. На почетокот на мај, тој настапи во љубљанско Стожице, каде што го одржа првиот голем концерт во арена во својата кариера.
Особено емотивна атмосфера владееше за време на изведбата на песната „Ја волим“, кога публиката пееше заедно со него, додека социјалните мрежи беа преплавени со видеа од пејачот како плаче за време на песната „Kuća puna naroda“.
Јаков ќе настапи во Арена Загреб на 19 и 20 јуни, а откако ги распродаде билетите за концертот во Виена на 17 октомври, организаторите веднаш додадоа уште еден датум, на 18 октомври.
