Билјана Митрева работи во приватна фирма за транспорт, а со градинарство се занимава од дете.
Љубовта кон цвеќињата – вели – ја наследила од нејзината баба.
– За уредување на нашето дворче одговорни сме цело семејство, јас, сопругот и нашата ќерка – ни објаснува Билјана и напоменува дека за многу брзо време, само четири години, од плац средиле сè.
Дворот е со површина од околу 300 метри квадратни и се наоѓа во Велес. Во него доминираат прунус спиноза, албиција, вистерија, ваигелија, хибискус, ловоров лист, индиски јоргован, јапонски џуџест јавор, а има и трендафили во сите бои и многу скуленти.
Секако, оваа убавина си бара голема посветеност.
– Секојдневно посветувам околу два часа во дворот – ни открива Билјана и додава – колку повеќе цвеќиња во дворот, повеќе мир во душата.
За оние кои сакаат да почнат да се занимаваат со одгледување цвеќе, Билјана открива кои растенија бараат сонце.
– Ваигелиа, албиција, хибискус и летем чемпес бараат сонце.
Најголем предизвик за Билјана, но и за сите челнови на семејството, кога е во прашање дворот е одржување на тревникот кој треба да се коси секој четврти ден.
Инаку, Билјана е членка на Фејсбук групата …ДВОРЧЕТО…, група која ви ја препорачуваме да си станете член и да се изнагледате преубави објави!
Уживајте во прекрасната фотогалерија од дворот на Билјана во Велес.
Фото – приватна архива
