Доколку имате информации за ова лице, ве молиме известете ја најблиската полициска станица или јавете се на 192, напишаа на веб-страницата „Исчезнати“ кои објавија дека од средата наутро ѝ се губи секаква трага на Катарина Раутек Омазиќ (39). Станува збор за поранешната пејачка на бендот Електро тим (ЕТ). Полицијата и семејството интензивно трагаат по неа. Раутек Омазиќ самоволно се оддалечила од загрепската болница Свети Дух и оттогаш никој не знае каде е.
Катарина беше во бендот ЕТ 11 години, а нејзиното заминување од групата ги изненади фановите, особено што беше уште едно во низата заминувања на вокали од групата по Вана, Андреа Чулибрк и Лана Клингор.
– Тоа беше најубавиот период во мојот живот. Се разделивме пријателски затоа што едноставно беше време за промени – изјави тогаш Катарина и откри дека сега самата би сакала да се проба во музиката. Таа и Адонис Ќулибрк, попознат како Бојтроник, тргнаа по својот пат во 2016 година. Катарина испеа многу песни кои беа голем хит, како „Пријди без причина“, „Празен стан“…
Во 2017 година Катарина се омажи за машинскиот инженер и претприемач Јосип Омазиќ, а во 2019 година го роди своето трето дете. Јосип има ќерка од претходната врска.
-Бракот ми е супер, и така беше со Јосип и пред бракот, доживеав дека некој ме почитува и многу ми помага. Не гарантирам дека секогаш ќе биде така, но досега ни е супер – изјави пејачката пред неколку години.
Групата ЕТ е основана од Бојтроник во јуни 1987 година и започна како прв рап бенд во Хрватска.
Од Јавното обвинителство во Загреб, каде што е пријавено исчезнувањето на Катарина Раутек Омазиќ, велат дека информации околу исчезнувањето можат да се достават и преку е-маил адресата: [email protected].
