Ким Кардашијан Вест минатата година во интервју за „Vogue“ откри дека студира право, дека 4 години ќе биде приправник во една канцеларија во Сан Франциско и дека ќе го полага правосудниот испит во 2022 година.
Многумина не го сфатија озбилно овој нејзин потег во кариерата, но сега се појавуваат информации кои откриваат дека во прашање е само дел од многу поголем план на Ким Кардашијан – еден ден да стане претседателка на Америка.
Нејзиниот најдобар пријател Џонатан Чебан, кој пред неколку месеци го смени законски своето име во Фудгод (анг. бог на храната), во разговор за MailOnline сподели интересни детали.
„Мислам дека некако ќе завршиме во Белата куќа. Не знам што точно ќе биде мојата улога, но некако ќе успееме да бидеме во Белата куќа“, рече тој. „Потребна ми е позиција во Белата куќа. Сакам да се залагам за тоа сите деца да имаат прекрасен ручек во училиште. Би можел да бидам секретар за социјални прашања, нешто забавно“.
Со оглед на тоа дека Канје Вест повеќе пати најавуваше дека ќе се кандидира за претседател во 2024 година, што малкумина го сфатија сериозно, многумина веруваа дека Ким Кардашијан се надева да влезе во Белата куќа како прва дама, но Чебан се надева дека неговата пријателка ќе биде претседателка.
„Навистина можам да го замислам тоа“, рекол тој во Њујорк.
„Мислам дека би можела да биде првата жена претседател овде. Жал ми е што на Хилари тоа не ѝ успеа. Таа е многу попривлечна од Хилари“, имаше Фудгод порака за Хилари Клинтон, поранешната прва дама и поранешна кандидатка за претседател на Америка.
Тој додал дека доколку Ким стане претседателка, тој ќе се погрижи сите во светот да јадат „добра храна“ и сите да ги имаат „десертите на Фудгод“.
„На секој во животот му треба малце Фудгод“, заклучи тој.
Инаку, Ким Кардашијан два пати ја има посетено Белата куќа. Неодамна зборуваше за тоа колку е важно Американците да им помогнат на поранешните зартвореници да се вработат, а во мај 2018 година со претседателот Трамп во Вашингтон се сретна за да разговара во врска со случајот на Али Мери Џонсон, која во 1997 година е осудена на доживотен затвор поради ненасилно злодело поврзано со дрога во Мемфис, за претседателот наредниот месец веќе да ја помилува затвореничката.
