Властите во Велика Британија ги предупредија тамошните лекари да бидат внимателни кога станува збор за навивачите кои се враќаат од Светското првенство во Катар, кои манифестираат симптоми кои се карактеристични за таканаречен камилски грип.
Како што е наведено, станува збор за болест која потекнува од семејството на коронавирус. Станува збор за Блискоисточен респираторен синдром (МЕРС), вирусно респираторно заболување, кое првпат беше идентификувано во Саудиска Арабија во 2012 година.
Вирусот, кој припаѓа на големото семејство на коронавируси, може да предизвика болести кои се движат од обична настинка до тежок акутен респираторен синдром (САРС) и ковид-19.
Вообичаени симптоми на МЕРС се треска, кашлица и отежнато дишење. Пневмонијата е честа појава, но не мора да се појави кај сите пациенти. Гастроинтестинални симптоми, вклучително и дијареа, исто така се пријавени кај пациенти со МЕРС. Стапката на смртност во регистрираните случаи на инфекција со MERS-CoV е 35 проценти, а вистинската стапка на смртност од оваа болест е најверојатно значително помала поради фактот што се регистрирани само пациенти со тешка клиничка слика и оние кои се подложени на лабораториски тестови.
