Денес разговараме со прекрасната цветна дама Јана Баснаркова, жена со презиме кое го оправдува епитетот (басна) на дворот за кој се грижи и кој го уредува.
Јана живее во село Ваташа – село кое граничи со градот Кавадарци, во областа Тиквеш, а површината на семејниот двор зафаќа околу двестотини квадратни метри.
Од семејството Баснарковски нè известија дека за убавината на нивниот двор најзаслужна е токму – Јана.
Таа е пензионерка, а до неодамна аботела како шивачка во една конфекциска компанија. Со одгледување на цвеќиња се занимава долго време, околу 15-на години. И отксекогаш и биле најомилена работа.
– Одговорноста за дворот ја имаме сите во нашата куќа, но најмногу посветени околу цвеќињата и уредувањето сме јас и мојата снаа – ни открива Јана и додава дека „колку повеќе му посветувате внимание на дворот – толку ќе биде поуреден“.
Во дворот доминираат бонбонките, петуниите, џунџулињата, винките, бегонијата, темјанчето, кактусите…Вистински рај за очите! Но овој рај си бара посветеност и тоа најмалку два часа во текот на денот. Јана пак, вели дека тие два часа веднаш ѝ поминуват, тука, меѓу оваа убавина, грижејќи се за неа, дури и тогаш кога е многу уморна.
– Секое утро ги наводнувам како и секоја вечер после 21 часот. Со љубов ги гледам и тие ми враќаат со иста мера – вели Јана.
Таа советува дека за оние кои имаат дворови изложени на сонце, најпогодни за одгледување се бонбонката, џунџулето, викната и темјанчето, додека за балкони идеална е петунијата и сарделата.
Што се однесува до предизвикот поврзан за дворот, за Јана тоа е дворот секогаш да ѝ биде чист и уреден бидејќи – како што вели – „со самиот поглед во цвеќињата и уживањето во дворот со најблиските ме прави да сум среќна и исполнета“.
Стигнуваме до советот од Јана за сите оние кои сакаат да почнат да се занимаваат со одгледување цвеќе.
– Најпрво треба да се има огромна желба и слободно време затоа што секое цвеќе си бара посебно негување и внимание. Јас, како за почеток, почнав со бонбонката, затоа што ми е омилено цвеќе, а ккао поминуваат годините дворот го надополнував со повеќе видови цвеќиња – заклучува таа.
Инаку, снаата на Јана, Пепа Баснаркова, е членка на Фејсбук групата …ДВОРЧЕТО…, група која ви ја препорачуваме да си станете член и да се изнагледате преубави објави!
Уживајте во фотогалеријата од дворот – басна на семејство Баснаркови.
Фото – приватна архива
