Хрватите ги „шијат“ и Србите во јадење месо, а Македонците и Албанците не се по месото, или немаат доволно пари да си го приуштат.
Веб-страницата Лангеист мап објави мапа на Европа на која се прикажани податоци за потрошувачката на месо по земји. Интересно е што Македонија е на дното на оваа листа, а податоците на просекот покажуваат дека секој жител на Македонија јаде по 39 килограми месо годишно.
Шпанија е на прво место со 99 килограми месо по жител. Второто место го зазеде Португалија со 95 килограми, додека на трето место е Исланд со 91 килограм месо по жител. Овие земји се и најголеми потрошувачи на морска храна во Европа.
Земји кои консумираат најмалку месо се Македонија, Турција, Албанија и Молдавија со 39 килограми месо по жител годишно.
Кога станува збор за земјите од регионот, интересен е податокот дека најголема потрошувачка на месо се граѓаните на Хрватска со 80 килограми по жител, а потоа следат граѓаните на Црна Гора со 78 килограми и Словенија со 70 килограми месо по жител. Србија е нешто поблиску до Босна и Херцеговина во однос на потрошувачката на месо, каде што еден жител во просек јаде до 56 килограми месо годишно.
