Ги разбирате Агличаните? Се „напнаа“ на италијанскиот спринтер Марсел Јакобс, а заборавија да ги исконтролираат нивните атлетичари – Британецот Си Џеј Уџа, со сребрен медал на 4х100 на Олимпијадата во Токио, е позитивен на допинг.
Си Џеј Уџа, британскиот спринтер кој освои сребрен медал како дел од машката штафета 4х100 метри на Олимписките игри во Токио, зад екипата на Италија, е суспендиран поради наводно кршење на анти-допинг правилата. Според написите на британските медиуми, 27-годишниот Уџа, кој беше дел од британскиот тим, заедно со Жарнел Хјуз, Ричард Килти и Натаниел Мичел-Блејк, покажал позитивен резултат на допинг за време на ОИ – станува збор за две забранети супстанции познати како САРМ (Селективен андроген рецепторски модулатор) кој помага во градењето мускули, и Остарин, анаболен агенс.
Веб-страницата на Агенцијата за анти допинг на Велика Британија го опишува остаринот како „ефект сличен на тестостерон“. И додава: „Додатоците во исхраната што содржат остарин обично промовираат градење на мускули. Бескрупулозните производители можат да ги пласираат производите како „легални стероиди“ или „алтернативи на стероидите“.
Уџа доби привремена суспензија од атлетиката во очекување на истрага од страна на Единицата за атлетски интегритет. Објавено е дека уште тројца спортисти ги прекршиле анти-допинг правилата: тркачот на Бахреин Садик Миху, грузискиот фрлач на тегови Беник Абрамјан и кенискиот спринтер Марк Отиено Одијамбо.
Марсел Jaкобс пак, ја затвори сезоната, најавувајќи им „состанок“ на своите фанови на Инстаграм дури во 2022 година. Спринтерот требаше да се натпреварува на 21 август во Јуџин, Орегон, но тоа е веќе откажано, како и спонзорството од „Најк“. Умната одлука на Јакобс е – кога ќе се врати – да се појави во топ форма, па заедно со тренерот и раководството на клубот, тој одлучи да застане, да поужива во двете злата и да се врати на патеката дури следната сезона.
