Според метеопрогнозерот Славчо Попоски, денес ќе имаме стабилно, суво и претежно сончево време. Ќе биде и значително потопло преку ден поради продорот на топла воздушна маса од југ.
Преку ден максималните дневни температури на воздухот ќе се искачуваат во интервалот од 14 до 20 степени, а во најтоплите централни и југоисточни предели температурата ќе се искачи до околу 22 степени.
Денес вечер, во 22.24 часот официјално почнува пролетта.
Ова е денот кога денот и ноќта траат по 12 часа и се еднакви, па тој ден се нарекува пролетна рамноденица.
Според астрономските критериуми, пролетта трае до 21 јуни (летото на тој ден пристигнува во 16 часот и 57 минути).
Да потсетиме дека само неколку дена по почетокот на пролетта ќе започне летното сметање на времето, поточно од 26 март кога ќе спиеме еден час пократко. Летното сметање на времето ќе важи до 29 октомври.
