Во Стејплес центарот во Лос Анџелес синоќа се одржа доделувањето на музичките Греми награди, а младата музичка ѕвезда, 18-годишната поп пејачка Били Ајлиш беше најголем победник со дури пет освоени награди, вклучувајќи ја и наградата за најдобар нов пејач, а нејзиниот хит „Bad guy“ е прогласен за песна на годината.
Покрај ова, Ајлиш ја освои и наградата за најдобар албум на годината, за својот дебитантски албум „When we all fall asleep, where do we go“, пренесува „Би-Би-Си“.
Со освојувањето на тие награди, новата американска ѕвезда го сруши рекордот на Тејлор Свифт како најмлада пејачка која некогаш ја добила оваа награда.
Нејзиниот повозрасен брат, Финиас О’Конел, исто така доби награди како продуцент за работа на нејзиниот албум, кој инаку е снимен во нивната семејна куќа.
Греми наградата за видео на годината ја освои Лил Нас Х за песната „Old town road“, како и златен грамофон за поп дуото или групниот настап, заедно со Били Реј Сајрус.
Пејачката Лизо освои три награди, помеѓу кои и оние за најдобра соло поп изведба на хитот „Truth hurts“, како и за традиционален R&B настап и за современ албум.
Инаку, почетокот на церемонијата помина во знакот на трагичната смрт на НБА легендата Коби Брајант, на кого му беше оддадена почит со едноминутно молчење на самиот почеток, а главната програма ја отворија пејачките Лизо и Алиша Киз, кои во сојот говор го споменаа големиот спортист.
Поранешната прва дама на САД, Мишел Обама, доби Греми награда за најдобар говорен албум, односно за аудио книгата „Becoming“, додека кантри пејачката Тања Такер го доби првото Греми на 61 година, за најдобар кантри албум „While i’m living“ и за најдобра кантри песна „Bring my flowers now“.
Греми наградата за најдобра компилација за визуелни медиуми ја освои песната „Shallow“, која ја изведуваат Лејди Гага и Бредли Купер.
