Сè почесто се среќаваме со животни приказни на пензионери кои го напуштаат градот и се враќаат на село, на здрав живот, и се посветуваат на производство на домашни намирници. Таква е и приказната на Васка и Благоја Блажески.
![](https://espreso.mk/wp-content/uploads/2021/10/penzionerite.jpg)
Васка и Благоја Блажески откако се пензионирале го напуштиле Кичево и се преселиле во селото Лазоровци кое се наоѓа северо-источно од Кичево, а од источната страна се допира со падините на гребенот Гол Рид.
Благоја има 70 години, а Васка 68, но годините не се пречка да успеваат, сами двајцата, да произведуваат здрава храна за четири семејства.
– Татко ми и мајка ми имаат три деца, две ќерки и еден син. Сите ние имаме семејства, па така имаат пет внуци. Навистина сме голема фамилија, – ни раскажува нивната ќерка Билјана Илиоски и додава:
– Откако се преселија на село, велат, се препородиле. Произведуваат здрава храна за нив, и за нивните деца. Работат сами бидејќи сите ние сме зафатени со сопствените работи, ама не е тешко, велат, за децата мора да има здрава храна.
Инаку, Васка многу сака да готви, а јадењата ги подготвува со домашно произведени намирници.
– Кај нив дома, во секој момент има по неколку јадења, – горда е нивната ќерка Билјана и објаснува дека задачите им се поделени, додека мајка ѝ со задоволство готви за сите, татко ѝ оди во град да им го однесе ручекот на сите три семејства.
Во домот на Васка и Благоја нема што нема, и сè е дар од природата, што потврдува дека таа – природата, неизмерно им враќа на оние кои ќе ѝ се вратат и ќе ѝ се посветат.
Инаку, нивната ќерка Билјана Илиоски, е членка на Фејсбук групата …ДВОРЧЕТО…, група која ви ја препорачуваме да си станете член и да се изнагледате преубави објави!
фОТО – ПРИВАТНА АРХИВА