Јуле ни ги носи сите бои на есента на нашата трпеза. Уживајте и вие, во вашите домови, во ваквите убавини кои овојпат ни доаѓаат од Гостивар.
Јулијана Златаноска од Гостивар, вработена во „СЛ Клуб“, е сопруга и мајка на две деца, Кристијан и Стефан. Вели дека готви од мала и дека повеќе ги сака комплицираните рецепти. Нејзините први такви творби биле пуслица и јапонски ветер кои ги направила кога имала 13 години. Љубовта за готвењето ја наследила од нејзините родители, кои цел живот работеле во кујни и ресторани.
– Готвењето ме опушта, тоа ми е како антистрес терапија и бегство од проблемите што ги носи животот. Сакам да готвам и традиционални рецепти и секогаш се трудам да изгледаат убаво и вкусно, и на око и на вкус, вели Јуле и ни открива како да ја разубавиме трпезата воесенски бои и мириси преку неодоливиот рецепт со јаболка.
КРЦКАВИ И АРОМАТИЧНИ КОРПИ СО ЈАБОЛКА
Подготовка:
100 грама шеќер се растопува и се додава 50 грама путер. 4 излупени јаболки се сечкаат и се пропржуваат во шеќерот. Се додава по 50 грама брусница и ореви, малку цимет и рум. Се редат 4 кори една врз друга, и се сечкаат на коцки колку калапот за мафини. Се прават 6 корпи, се полнат со филот, се наросува со ливчиња бадеми и кратко се потпекува.
Се служат топли со топка сладолед.
*
Овие написи може да ги следите и во групата … ДВОРЧЕТО …, група во која има едно чудо разноразни убавини, и која ви ја препорачуваме да ја посетите и да си станете нејзин член!
УЖИВАЈТЕ ВО ФОТОГАЛЕРИЈАТА.
