Пред неколку часа на Јутјуб пуштена е пиратирана верзија на македонскиот документарен филм „Медена земја“, а истиот може да се гледа во целост, но не за долго.
Иако видеото стана вирално на социјалните медиуми и некои македонски медиуми ентузијастично ја пренесоа веста дека документарниот филм е достапен за гледање на Јутјуб, режисерот Атанас Георгиев во изјава за СДК потврдува дека документарниот филм е пиратиран и нелегално пуштен на видео платформата, како и дека по нивната реакција на Јутјуб истиот ќе биде отстранет. Тој напоменува и предупредува дека секакво објавување на линкот од Јутјуб со пиратираниот филм е казниво со закон и дека соодветно ќе реагираат.
Светските дистрибутерски права за „Медена земја“ и припаѓаат на американската куќа „НЕОН“, додека документарниот филм во моментов може да се гледа на гигантската стриминг платформа „ХУЛУ“.
Македонскиот документарен филм „Медена земја“ е во трка за два оскари, и тоа за најдобар документарен филм и најдобар интернационален филм. Освен што овие две номинации испишуваат нова историја во македонската кинематографија, за прв пат во историјата на Оскарите документарен филм добива номинација и во категоријата најдобар интернационален филм.
The post Злоупотребена „Медена земја“: Пиратска верзија на македонскиот документарен филм одекна на Јутјуб appeared first on Слободен печат.
