Денеска и утре идните студенти треба по електронски пат да ги поднесат сите документи кои им се потребни за запишување на најстариот Универзитет „Кирил и Методиј“ во Скопје.
Како резултат на пандемијата со Ковид-19, оваа година за првпат студентите за упис на некој од факултети при УКИМ целосната документација ќе може да ја доставуваат онлајн, со цел да се спречат гужвите кои секоја година се создаваат пред студентските прашања при упис на студентите.
На секој од сајтовите на факултетите детално е објаснета постапката на кој начин и каде треба да се прикачат документите, а исто така оставен е и мејл за сите оние кои нема да успеат да се снајдат при електронскиот начин на упис.
„Поради новонастанатата ситуација поврзана со коронавирусот (COVID-19), оваа година потребните документи ќе се доставуваат по електронски пат во дигитална форма задолжително на следниве два начини: По вашата електронска пријава на страната www.upisi.ukim.mk, ваша задолжителна обврска е електронско прикачување на документите“, стои на сајтот на Правниот факултет „Јустинијан Први“.
Студентите на социјалните мрежи го искажаа своето задоволство поради тоа што е пронајден начин за електронско пријавување.
– Наместо со маски да чекаме пред студентски, вака е подобро. Се надевам дека нема да се случи да дојде до паѓање на онлајн системот за електронско пријавување, па тоа да ни донесе дополнителни проблеми. Инаку, овој начин на пријавување е навистина подобар, но ќе видиме како тоа ќе се одвива на дело – вели Никола Арсов, кој денеска ги достави своите документи за упис на Економскиот факултет при УКИМ.
Со годинашниот конкурс на 23 факултети на УКИМ има вкупно 10.798 слободни места. Од нив, 5.300 места се во редовната квота, а 4.438 се за кофинансирање на студиите. За вонредни студенти има 1.060 слободни места. Во државна квота се плаќа 200 евра годишно, додека во квотата со кофинансирање ќе се плаќа по 400 евра.
Прелиминарната ранг-листа со резултати од успехот од средно образование на пријавените кандидати ќе биде објавена на 3 септември, додека конечната ранг-листа ќе се објави на 7 септември.
Примените кандидати ќе се запишуваат на 10 и на 11 септември со физичко присуство и со посебни протоколи, кои, како што велат од УКИМ, ќе им бидат дополнително соопштени на сите бруцоши.
Од друга страна пак, на Универзитетот „Свети Климент Охридски“ (УКЛО) во Битола, како и на штипскиот Универзитет „Гоце Делчев“ (УГД), денеска е последен рок за поднесување на документите.
Според конкурсот за упис на нови студенти на УКЛО, во академската 2020/2021 година на 11 високообразовни институции слободни се 2.697 места.
За разлика од останатите Универзитети во земјата, Универзитетот „Гоце Делчев“ отвори и физички пунктови за прием на документи во првиот уписен рок.
Според актуелниот конкурс, слободни се 3.831 место на сите 12 факултети и 3 академии при УГД.
Пријавувањето во овој прв уписен рок се одвива според сите протоколи за заштита на идните студенти, соопштија од УГД.
– За да се поедностави целиот процес студентите треба да направат профил на нашата веб-страница, да ги поднесат сите пријави, да ги направат сите електронски плаќања, да ги внесат своите оценки и следен чекор е да ги достават и физички своите документи. Сите оние кои не можат да се снајдат нека се упатат во некој од нашите наставни центри и ќе им помогнеме да ги испроцесираат документите. Првиот уписен рок е од 24 август до 1 септември. Ова е период кој студентите треба да го искористат за да ги донесат своите документи. На веб-страницата на УГД ги има сите потребни информации – вели проректорот за настава на УГД, проф. д-р Мишко Џидров.
Претходно, од 1 јули секој кандидат за упис на некој од факултетите на УГД можеше да се пријави во електронски систем, во кој си креира профил и внесува лични податоци, а конечни резултати за примени кандидати ќе има на 4 септември.
The post Почнаа онлајн уписите на факултетите, отворени се и физички пунктови за прием на документи appeared first on Слободен печат.
Почнаа онлајн уписите на факултетите, отворени се и физички пунктови за прием на документи was first posted on август 31, 2020 at 12:48 pm.
