По одржувањето на конститутивната седница на Собранието, од денеска почнуваат и разговорите за формирање на новата влада. Партиите кои по изборите неофицијално ги почнаа разговорите, се очекува од денеска да ги интензивираат напорите околу обезбедување мнозинство во новиот парламентарен состав и формирање нова влада.
Лидерот на СДСМ Зоран Заев како што најави и по изборите, преговорите за нова Влада официјално ќе ги почне по Илинден.
Во своето интервју дадено за хрватскиот неделник „Национал” пред десетина дена, Заев рече дека СДСМ има убедливо најголем коалициски потенцијал. – Мандатот за формирање нова Влада е кај СДСМ и коалицијата „Можеме”. Веднаш по празникот Илинден кој е на 2 август, влегуваме во процес на преговори за идно коалицирање и формирање состав на Влада, рече тогаш Заев.
Тој најави дека ќе разговараат за коалицирање со сите партии кои се подготвени да го прифатат европскиот, демократскиот, слободарскиот, напредниот концепт и патот што Северна Македонија го оди како земја членка на НАТО. За „структурите кои заговараат идеи различни од демократскиот и европскиот концепт”, како што рече Заев, не може да бидат дел од идната владејачка коалиција водена од СДСМ.
Лидерот на ВМРО-ДПМНЕ Христијан Мицкоски завчера во обраќањето по повод двата Илиндена од Ташмаруништа, Струшко, повтори дека „ќе учествуваат во натпреварот за формирање влада, којшто се игра до последна минута”.
Мицкоски минатата недела рече дека не поддржува широка коалиција и смета оти таквата Влада ќе биде неефикасна, бидејќи тоа се докажало и со техничката влада.
Мицкоски тогаш истакна дека нема ништо конкретно околу преговорите за нова Влада и оти досега се сведува на „мерење на политичките сили”. Тој оцени дека не би се изненадил ако никој не успее да формира влада, не ја исклучува можноста за нови парламентарни избори наесен.
На неговите тврдења за нови избори премиерот и потпретседател на СДСМ Оливер Спасовски рече дека Мицкоски секој ден ги менува ставовите и оти на изборите што поминаа има јасен победник, а тоа е СДСМ.
Претседателот Пендаровски минатата недела најави дека мандатот за состав на идната влада ќе му го довери на оној ќе го увери дека стасал до мнозинство во Собранието.
Посочи дека уставната норма е кристално јасна – мандатот го добива кандидатот на партијата или партиите што имаат мнозинство во Собранието и тука претседателот нема буквално никаков маневарски простор.
-Најконкретно, ќе го доделам мандатот на кој било претставник на која било од 6-те изборни листи кои освоија пратеници во парламентот, кој ќе ме увери дека има мнозинство од 61 пратеник, потенцира Пендаровски во минатонеделното интервјуто за „Фокус”.
Пендаровски во Илинденското обраќање на Пелинце, изрази очекување дека новата влада ќе се формира што е можно побрзо и таа влада, како што рече, ќе нема комоција да не и бидат поставувани тешки прашања во првите 100 дена. Новата Влада, според него, ќе има и друга комплексна задача, особено, како што рече, после ваква изборна кампања во која беа изречени тешки обвинувања и лични дисквалификации кои дополнително ги продлабочија поделбите меѓу граѓаните, истакувајќи оти помирувањето ни е потребно повеќе од кога било во историјата.
Според Уставот, претседателот на државата е должен во рок од 10 дена од конституирањето на законодавниот дом мандатот за состав на Владата да го довери на кандидат на партијата, односно партиите што имаат мнозинство во Собранието. Мандатарот, пак, во рок од 20 дена од денот на доверувањето на мандатот, на Собранието треба да му поднесе програма и предлог состав на Владата.
На предвремените парламентрани избори што се одржаа на 15 јули, коалицијата „Можеме” предоведна од СДСМ освои 46 пратеници, коалицијата на ВМРО-ДПМНЕ 44, ДУИ 15, Алијанса на Албанците и Алтернатива 12, Левица два и ДПА еден мандат.
The post По конститутивната седница, од денес почнуваат разговори за формирање нова влада appeared first on Слободен печат.
По конститутивната седница, од денес почнуваат разговори за формирање нова влада was first posted on август 4, 2020 at 7:31 am.
