Кралицата Камила (78) се одлучи за популарен козметички третман – тетовирање на веѓи. Својот нов изглед, кој вклучува погусти и подефинирани веѓи, го покажа претходно оваа недела, а постапката ѝ ја правела познатата лондонска експертка Сузан Мартин. Станува збор за третман чија цена изнесува 1870 долари (околу 1720 евра), а е осмислен за да се постигне што поприроден изглед.
Постапката наречена Couture Brow вклучува исцртување на секое поединечно влакно на кожата со специјално пенкало за тетовирање. Пред самиот третман, секој клиент поминува детални консултации и избор на нијанса, а пигментот се внесува веднаш под горниот слој на кожата. Третманот се изведува во две сесии од по 90 минути, а за одржување на резултатите се препорачува освежување на секои осум до десет месеци по цена од 1070 долари (околу 980 евра). Освен со кралицата Камила, Мартин соработувала и со ѕвезди како Дуа Липа и Ели Гудинг.
Последниве денови веѓите на Камила изгледаат забележливо потемни, што е вообичаено веднаш по третманот. Имено, бојата на тетовираните веѓи на почетокот е најинтензивна, а со текот на времето избледува до посакуваната, поприродна нијанса.
