Хана Хуљиќ-Грашо ретко зборува подетално за својот приватен живот, но сега откри како започнала нејзината љубовна приказна со Петар Грашо, како изгледа нивното секојдневие со децата и дали размислуваат за проширување на семејството.
Во разговор за „Ин магазин“, Хана се присети на моментот кога двајцата сфатиле дека нивниот однос повеќе не е само пријателски. Како што раскажа, тоа се случило во период кога и двајцата ги завршиле своите долгогодишни врски.
„Се сеќавам на тој момент бидејќи се случи обострано и се случи во моментот кога двајцата ги завршивме нашите долгогодишни врски. Тоа беше момент на сознание кое не сакавме да го спознаеме и беше прилично чудно. Нам всушност сè ни беше чудно, а дури денес гледам колку сето тоа требало да биде токму така“, раскажа Хана.
Денес тие се во брак и се родители на четиригодишната Алба и двегодишниот Тони. Иако Грашо често патува поради концертните обврски, Хана вели дека секогаш се труди да поминува што повеќе време со семејството.
„Тој толку многу го сака тоа што го работи и тој е тоа што го работи. Никогаш не сум барала од него да престане да биде тоа, а колку време е дома во однос на тоа колку не би требало да биде дома е навистина фасцинантно“, рече таа.
Таа откри дека пејачот по настапите неретко веднаш тргнува кон дома, дури и кога има само кратко време до следното патување.
„По концерт во Словенија, во еден часот по полноќ тргнува дома, доаѓа во четири-пет наутро за следниот ден да биде со нас, бидејќи задутре повторно оди некаде. Толку е посветен. Доаѓа дома, готви ручек, подготвува вечера и повторно оди на работа, а нему сето тоа му е лесно.“
Хана проговори и за предизвиците што ги носи растењето во познато семејство. Таа и самата потекнува од познато музичко семејство, а призна дека како интровертно дете тешко се справувала со погледите и коментарите на луѓето.
„Јас бев страшно интровертно дете и многу тешко ми паѓаше кога шетавме, а сите се вртеа и шепотеа, но за среќа, сега, на овие години, успеав да го надминам сето тоа. Од познато семејство, по игра на случајот, дојдов во уште попознато семејство и всушност, кога ќе го соголам сето тоа, денес ми е смешно. Некој навистина добро си поиграл со нас“, рече таа.
Токму поради сопственото искуство, Хана размислува и за тоа како Алба и Тони ќе се справуваат со јавноста кога ќе пораснат. Особено ја загрижуваат социјалните мрежи и можноста секој да им упатува коментари.
„Тешко е во ова време кога сè е на дофат, социјалните мрежи, кога кој било може да ти напише што било во кој било момент. Тоа порано го немаше, а денес е страшно и има сè повеќе анксиозност. Искрено, од тоа најмногу се плашам. Ние ќе им ги всадиме основните семејни вредности, а понатаму, колку и да ги воспитуваме, знам дека во голема мера ќе ги воспитува и општеството“, призна Хана.
Таа откри и дека во моментов не планира трето дете бидејќи се чувствува целосно остварено како мајка на Алба и Тони, но не ја исклучува можноста нивното семејство повторно да се прошири.
„Јас сега сум целосно остварена како мајка и мислам дека тие двајца се сосема доволни, особено со оглед на тоа колку се неверојатно енергични и не знам како мојот организам би издржал уште една таква енергија. Но, ако се случи, секако, нека се случи. Ако остане и вака, всушност ова е токму она што го планирав, па ќе видиме дали моите планови успеале.“
Повод за интервјуто била нејзината нова песна „Друштвена игра“ („Board Game“), на која работела неколку месеци. Во пишувањето на текстот ѝ помогнал нејзиниот брат Иван Хуљиќ.
Песната зборува за проблематичен однос меѓу две личности, но Хана објасни дека пораката не е исклучиво љубовна и дека може да се поврзе и со војните и со начинот на кој светските лидери управуваат со луѓето како со фигури на табла за игра. Таа нагласи дека песната не е автобиографска.
Покрај новата песна, Хана во моментов завршува една оркестрација, подготвува нова детска песна и размислува за поинтимни концерти на кои би ја претставила својата музика пред публиката.
