Српската пејачка Марија Шерифовиќ отпатувала на Бали, од каде што се огласила на социјалните мрежи и со следбениците ги споделила своето искрено размислување за животот, потребата да држи сè под контрола и одлуката некои работи едноставно да ги пушти.
Пејачката признала дека голем дел од својот живот верувала дека мора однапред да знае што ја чека, да го предвиди секој чекор и секогаш да биде еден чекор понапред.
– Првата половина од мојот живот ја поминав верувајќи дека сè мора да биде под контрола. Дека морам да знам, да предвидам, да бидам чекор понапред… Да ги држам конците во своите раце, дури и кога не беа мои – напишала пејачката.
Како што истакнала, денес сè повеќе сфаќа дека не мора секоја ситуација да биде нејзина грижа, ниту дека таа треба да ја донесува секоја одлука.
– Денес, ми се чини, една од најважните задачи што ги имам пред себе е да научам да пуштам. Не затоа што помалку ми е гајле, туку затоа што конечно разбирам дека не мора сè да биде моја грижа, моја одлука, моја одговорност – навела Марија.
Пејачката потоа истакнала дека учи дека не мора секогаш да има одговор на сè, ниту да ги разбира, спасува или насочува другите луѓе.
– Луѓето имаат право на свои избори, свои грешки, свои патишта. Исто како што и јас имам право на свои – порачала Шерифовиќ.
Пејачката открила и што сака да промени во втората половина од својот живот.
– И затоа би сакала во оваа втора половина од мојот живот да набљудувам и слушам што е можно повеќе, а помалку да зборувам и водам. Да научам да бидам присутна без да управувам. Да сакам без да стискам. Да верувам, дури и кога не знам што следи – заклучила пејачката.
