Денес разговараме со Ферка Исмаиловска, пензионерка, завршила средно економско училиште генерација 63/ 64 година, а работела како финансов книговодител.
Што се однесува до занимацијата со цвеќињата, вели дека датира уште пред да прооди и прозбори, ете оттогаш се дружи со цвеќиња.
– Мојот покоен дедо работеше во Паркови и зеленило, дворот што ни беше во Скопје, каде што е денес Универзитетот Кирил и Методиј, грееше од убавини! Сите во семејството бевме ангажирани околу одржувањето. Оттогаш е и мојата наклонетост кон природните убавини – вака ја започнува Ферка својата цветна приказна.
После земјотресот, се преселиле во барака во Трнодол, Козле, имале голем двор со цвеќиња и градинарски култури и тука Ферка имала придонес во одгледувањето. За нејзина среќа, во семејството каде се омажила – голем двор!
– Свекрва ми беше шампионка во одгледување на цвеќиња, но и во чист двор – вели Ферка.
Меракот го наследила, и вели дека сега не би можела да функционира без цвеќиња и чиста природа.
А, многу ѝ пречат местата кадешто природата се уништува.
– Бидејќи сум од возрасната генерација, а меракот е ист, можеби сум меѓу највозрасните членови на прекрасната група … ДВОРЧЕТО …, по заслуга на основачот Александар и неговите модератори. Оттаму црпам доста совети – искрена е нашата соговорничка.
Дворот на Ферка се простира на голема површина, а во него, покрај цвеќиња има и простор за рекреација на внучињата и нивните другарчиња.Затоа, на Ферка ѝ е потребна помош во одржувањето, но тука е семејството кое ѝ помага во косење, поливање и одгледување. Инаку, дворот се наоѓа во Синѓелиќ, на 13 километри оддалеченост од Скопје.
Ферка ни објаснува дека сите цвеќиња ѝ се омилени, без разлика на нивната цена и убавина, и дека не може да ги класира. Ја воодушевува и радува и најобичниот полски цвет! Сепак, разноличноста на цвеќињата и уредениот двор ѝ се приоритет.
Што се однесува до сезоната на студени денови, оваа цветна дама нема проблеми.
– Долгогодишното дружење со цвеќето ми помага кога и како да ги внесам и за нив да се грижам преку зимата. Имам цвеќиња стари и по 20 години, обновени и пресадувани – горда е Ферка.
На крај, стигнуваме до советот кој таа го дава за сите оние кои сакаат да започнат да се бават со одгледување на цвеќе.
– Мој совет за сите почетници е да почнат со одгледување на цвеќиња кои се лесни за одржување и зафаќање, за да не се разочараат од почеток, а постои можност и да се откажат. Откако ќе им успее со цвеќето со кое почнале, ќе се нафатат и на останатите кои бараат посебна нега,- советува Ферка.
Инаку, Ферка е член на Фејсбук групата …ДВОРЧЕТО…, група која ви ја препорачуваме да си станете член и да се изнагледате преубави објави!
УЖИВАЈТЕ ВО ФОТОГАЛЕРИЈАТА:
ФОТО – ПРИВАТНА АРХИВА
