Пејачот Жељко Самарџиќ вчера се сретна со својата публика во белградскиот Сава Центар, сала во која досега настапил дури 50 пати. Како и секогаш, приредил незаборавна вечер исполнета со силни емоции и позитивна енергија.
Пред концертот, Самарџиќ ги сподели своите размислувања, откри што му минувало низ глава пред да излезе на свената, за што му било жал, но и кое ветување не ѝ го дал на сопругата Маја – а сепак несвесно го исполнил.
– Голема работа е тоа што имам 70 години и што младата публика сè уште ме сака. Би им посакал на сите да ги доживеат овие години и да бидат сакани – изјави пејачот, додавајќи дека ги остварил сите свои соништа.
– Своите соништа ги остварив. Денес, додека ја држев во раце најмладата внука Ленка, помислив колку би било убаво да бидам присутен и на нејзиниот 18. роденден. Но, тоа е животот. Кај нас разликата во години е голема – најстариот внук има 20 години и игра кошарка во Америка – раскажа тој искрено.
Жељко откри и дека семејството редовно го следи на неговите концерти, уште од самиот почеток на кариерата. На прашањето кој е најголемиот критичар дома и дали ги прифаќа нивните мислења, одговори со насмевка:
– Сите имаат по некој коментар. Нема многу критики, јас сум глава на семејството и јас одлучувам, но кога станува збор за важни работи – тука е мојата Маја. Таа ми рече: „Нема што повеќе да си ветуваме, но ако исполниш една желба, многу ќе ме израдуваш – барем да ослабеш пет килограми“. Пред два месеца имав 102 килограми, а утрово на вагата видов 88. Не ѝ ветив, ама очигледно сум го остварил тоа потсвесно – се пошегува Самарџиќ пред новинарите.
