Керсон, најголемиот украински град окупиран од Русија, е без струја и вода. Ова го соопштија проруските власти кои го контролираат градот. Конкретно на Телеграм Јуриј Соболевски, заменик-шеф на регионалниот совет на Керсон, рече дека снабдувањето со електрична енергија и вода е прекинато поради „терористички напад“ кој оштети три далноводи на автопатот Берислав-Каховка.Соболевски објасни дека биле погодени околу 10 населби во регионот, покрај главниот град.
„Терористичката држава концентрира сили и средства да се врати за да ги погоди нашите инфраструктури со масовни напади“ и „особено енергетските“. Ова го изјави украинскиот претседател Володимир Зеленски, подвлекувајќи дека „токму поради оваа причина, на Русија и се потребни ирански ракети“. Украина, најави Зеленски, „се подготвува да одговори“.
Претходно, градоначалникот на Киев, Виталиј Кличко ги предупреди жителите дека мора да се подготват за најлошото оваа зима доколку Русија продолжи да ја погодува енергетската инфраструктура на земјата, а тоа значи дека не може да се исклучи дека нема да има струја, вода и греење за да се заштитат од студот.
„Правиме се за да го избегнеме тоа. Но, да бидеме искрени, нашите непријатели прават се за да го остават градот без греење, без струја, без водоснабдување, воопшто, па сите да умреме. И иднината на земјата и на иднината на секој од нас зависи од тоа колку сме подготвени за различни ситуации“, изјави Кличко за државните медиуми.
Во меѓувреме, претседателот Володимир Зеленски во својот ноќен видео говор пред нацијата во неделата рече дека околу 4,5 милиони луѓе се без струја. Тој ги повика Украинците да ги издржат тешкотиите и дека „мора да ја надминеме оваа зима и да бидеме уште посилни на пролет отколку сега“.
