Босанската музичка сцена е завиена во црно по трагичната вест дека утринава, во тешка сообраќајна несреќа кај местото Незуци, во близина на Вишеград, животот го загуби Самир Хоџиќ – еден од најпознатите и најценети хармоникаши во регионот.
Хоџиќ, меѓу народот познат како „првата хармоника на Вишеград“, загинал во судир на две патнички возила. Со својата виртуозност и препознатлив стил, тој важеше за еден од најдобрите инструменталисти во Босна и Херцеговина.
Збогување со музичка легенда
Веста за неговата смрт длабоко ги потресе колегите, пријателите и бројните почитувачи. Самир Хоџиќ зад себе остави богато музичко наследство и силен печат на естрадната сцена, а особено се издвојува неговата долгогодишна соработка со кралицата на севдахот, Ханка Палдум, со која настапуваше на бројни концерти и турнеи.
Беше познат како исклучителен професионалец, омилен меѓу луѓето и музичар кој со својата хармоника ги поврзуваше срцата. Неговиот инструмент беше неизоставен дел од многу свечености и концерти, а со неговото заминување, Вишеград изгуби вистинска музичка икона.
Детали за несреќата
Од Полициската управа Фоча соопштија дека несреќата се случила рано утринава.
„Во 6:50 часот до Полициската станица Вишеград беше пријавена сообраќајна несреќа во местото Незуци, во која учествувале две патнички возила. За жал, едно лице го загуби животот“, изјави портпаролката на ПУ Фоча, Светлана Говедарица.
За настанот бил известен и дежурниот обвинител од Окружното јавно обвинителство Источно Сараево, кој извршил увид на лице место. Сообраќајот на оваа делница бил привремено запрен до завршување на истражните дејствија.
Повеќе информации за причините и околностите под кои дошло до оваа трагедија се очекуваат по завршувањето на истрагата.
