Украинската уметница, солистка на украинскиот воен оркестар, Маргарита Мелешко, ја отпеала песната „Командант Сава“ непосредно пред да мора да се повлече во засолништето. Маргарита ја отпеала партизанската песна во јавувањето за црногорскиот портал Антена М.
Песната ја извела со својот колега Јарослав Џус, кој свири на украинскиот национален инструмент бандура. По песната таа требала да испрати видео во кое зборува за моменталната состојба во нејзината татковина, но сепак не успеала.
„Еве ја песната, како што ветив. Сега ни рекоа дека мораме да одиме во скривница, кога ќе можам ќе ви испратам видео од ситуацијата во Украина“, напишала таа за црногорскиот портал.
Песната „Командант Сава“ е за Сава Ковачевиќ, кој бил убиен од фашистите во Сутјеска во 1943 година. Песната е многу популарна во редовите на украинската армија и Маргарита често ја изведувала со воениот оркестар и хор.
