Во едно кафуле во центарот на Белград дошло до инцидент во кој познатиот актер и режисер Драган Бјелогрлиќ му го оттурнал мобилниот телефон од рака на тиктокерот Александар Шулц, кој го снимал и го провоцирал.
Шулц, на ТикТок познат како „Лепи“, му пришол на Бјелогрлиќ и започнал да му поставува прашања додека го снимал. Актерот првично љубезно одговарал, мислејќи дека станува збор за обожавател. Меѓутоа, кога сфатил дека се работи за провокација, според видеото што се шири на социјалните мрежи, Бјелогрлиќ рекол: „А, ти си овој“, нагло станал и со движење на раката му го оттурнал мобилниот. Тиктокерот му возвратил со: „Опа, што е?“, продолжувајќи да го снима и коментирајќи дека актерот е „нервозен“.
Dragan Bjelogrlić napao tiktokera u kafiću Glumac i reditelj Dragan Bjelogrlić našao se u centru incidenta nakon što je, prema snimku objavljenom na društvenim mrežama, pokušao da otme telefon tiktokeru Aleksandru Šulcu, poznatijem kao Lepi. #nisvesti #srbija #vesti #viral pic.twitter.com/QGKq0K6TZ1
— Niš Vesti (@NisVesti) February 24, 2026
Инцидентот се случува откако Бјелогрлиќ на 21 ноември 2024 година правосилно беше осуден на условна казна затвор од шест месеци, со рок на проверка од две години, поради насилничко однесување.
Тој беше осуден затоа што на 23 август 2021 година во хотелот „Амбасадор“ во Ниш физички го нападнал режисерот Предраг Антонијевиќ, удирајќи го повеќепати во пределот на главата. Бјелогрлиќ на сослушувањето го признал делото и изразил жалење.
Александар Шулц, познат како „Лепи“, е студент на Факултетот за технички науки во Нови Сад. На социјалните мрежи стана познат по видеа во кои критикува и прозива студенти и граѓани што учествуваат на протести против власта во Србија. Дел од српските медиуми го опишуваат како „режимски провокатор“.
Неговото име во јавноста беше спомнувано и на почетокот на овој месец, кога беше објавено дека за време на предизборна кампања во Кула дошло до напад врз активисти од листата „Млади Кула“. Според медиумските извештаи, маскирани лица тогаш фрлале боја врз членовите на листата, а на едно од лицата му паднала маската, по што бил идентификуван како Александар Шулц.
