Филмската легенда Арнолд Шварценегер го посети поранешниот нацистички логор Аушвиц, кадесе сретна со преживеан од Холокаустот и неговите роднини за да испрати порака против предрасудите и омразата.
Актерот од „Терминатор“ ги виде касарните, караулите и остатоците од гасните комори кои сведочат за нацистичкото истребување на Евреите за време на Втората светска војна.
Запознал и жена која како 3-годишно девојче била подложена на експерименти на озлогласениот нацистички лекар Јозеф Менгеле.
„Ова е приказна која мора да остане жива, приказна која мораме да ја раскажуваме повторно и повторно“, рече тој по неговата посета на поранешниот логор. „Ајде заедно да се бориме против предрасудите и да ставиме крај на нив еднаш засекогаш“, изјави 75-годишната холивудска ѕвезда.
Неговата прва посета на локацијата во јужна Полска, област под германска окупација за време на Втората светска војна, се случи како дел од неговата активност со Фондацијата Еврејски центар, чија мисија е да се бори против омразата преку образование.
