Ѕвездата од серијата „Пријатели“ Метју Пери (53), кој ненадејно почина во саботата во џакузи, ги промовираше своите мемоари пред неколку години, каде откри дека своевремено ограбувал плакари од бањи во туѓи куќи.
„Влегував прку отворените врати на куќите кои беа на продажба и одев во купатилата прашувајќи се дали имаат таблети, и ги крадев. Мислам дека луѓето мислеа „па, нема шанса Чендлер да влезе кај нас и да украде од нас“ – призна Пери.
Ваквите грабежи ги правел за време на врвот на славата.
Во своите мемоари, тој откри и дека присуствувал на 6.000 состаноци на анонимни алкохоличари, поминал 30 години на терапија, на рехабилитација поторшил 9 милиони долари и дури 65 пати бил подложен на детоксикација.
Првпат вкусил алкохол кога имал само 14 години.
Целата своја животна приказна, подеми и падови и борба со зависностите ја откри во своите мемоари. Тој опиша се, и како во еден момент поради лекови му пукнало дебелото црево, поради што бил во кома две недели и пет месеци во болница.
Тој станал зависен од апчиња откако првпат земал лек против болки во 1997 година по повреда на џет ски. Тој станал зависен од чувството кога го пиел апчето – болките исчезнувале, и рекол дека зема 55 Викодин апчиња дневно.
– Можете да следите како се развивала мојата зависност преку мојата тежина во серијата од сезона во сезона. Кога бев дебел, тоа беше алкохолот. Кога сум слаб, тоа се апчињата. Кога имам козја брадичка, тоа се многу апчиња“, изјави тој своеремено за ABC.
Пери како гостин на „The Late Show With Stephen Colbert“ отворено објасни дека за време на операцијата неговото срце застанало 5 минути поради болки во стомакот. Морале да го оживеат, а при оживувањето му скршиле осум ребра.
