Снимањето на новата серија „Марина и Фута“, инспирирана од животот на еден од најпознатите авторски тандеми на регионалната музичка сцена, започна во тајност, а првите информации за проектот веќе привлекоа големо внимание во јавноста.
Како што објавија регионалните медиуми, серијата ќе го следи животот на Марина Туцаковиќ и Александар Радуловиќ Фута од нивните почетоци на сцената, преку соработката со најголемите музички имиња на поранешна Југославија, па сè до турбулентните деведесетти и трансформацијата на локалната музичка сцена.
Особено внимание привлече информацијата дека ликот на Марина Туцаковиќ повторно ќе го толкува актерката Милица Јаневски, која ја играше истата улога во филмот „Недела“, посветен на животот на пејачот Џеј Рамадановски. Нејзината интерпретација потоа наиде на позитивни реакции од публиката и критиката.
Иако продукцијата сè уште не открива многу детали, медиумите објавуваат дека улогата на Фута би можела да ја игра Златан Видовиќ, но оваа информација сè уште не е официјално потврдена.
Според достапните информации, серијата треба да претставува една ера на музиката преку приказната за луѓето кои стоеле зад бројните хитови. Марина Туцаковиќ остави неизбришлива трага како текстописец за најголемите регионални ѕвезди, додека Фута беше еден од највлијателните продуценти во забавната индустрија.
Продукцијата го држи проектот подалеку од очите на јавноста, а сè уште не е познато кога серијата ќе има премиера или на која платформа или телевизија ќе се емитува.
