Марко Гвозденовиќ, син на пејачката Снежана Ѓуришиќ, сè уште е задржан на болничко лекување поради тешки телесни повреди што ги добил пред четири дена. Според информациите, до нападот дошло поради долг од 500 евра.
Наводно, Гвозденовиќ подолг период му должел пари на свој сосед. Бидејќи не успеал да ги врати, соседот решил насилно да се пресмета со него.
Според извор запознаен со случајот, соседот со месеци се обидувал да ги наплати парите, но без успех. Пред неколку дена го повикал Марко да дојде во неговиот стан со изговор дека сака мирно да се договорат. Меѓутоа, веднаш по неговото пристигнување започнало физичко насилство. Најпрво бил напаѓан од соседот, а потоа во тепањето се вклучило уште едно лице. Се сомнева дека целиот настан бил однапред испланиран.
Марко пред истражните органи изјавил дека отишол на средбата верувајќи дека несогласувањата ќе ги решат со разговор, но наместо тоа бил нападнат и претепан.
Лекарскиот преглед покажал дека има скршени ребра, бројни модринки, набиеници и расекотини по телото, како и повреди во пределот на градниот кош и главата. Поради сериозноста на повредите е задржан на понатамошно лекување и набљудување. Тој е свесен, комуницира и засега е во стабилна состојба.
Надлежното обвинителство наредило прибирање докази, земање изјави од учесниците и сведоците, како и обезбедување на целокупната медицинска документација за степенот на повредите.
