Џони Деп ќе биде гостин на следното шоу за долна облека на Ријана Savage X Fenty, потврди извор за BuzzFeed.
Иако не се знае точно каква улога ќе има Деп на модната ревија, многумина веќе коментираат дека Ријана е „изгубена во реалноста“. Тие сметаат дека и покрај судската пресуда во случајот со Амбер Херд, дамката на името на Деп се уште не е расчистена.
„Savage X Fenty е промашување, а Џони Деп е само уште еден пример за тоа колку навистина е изгубена Ријана“, изјави еден корисник на Твитер, додека фановите на Деп се радуваат на враќањето на актерот во центарот на вниманието.
„Ријана да го покани Џони Деп во своето шоу е многу чудно. Не постои ниту еден пристоен милијардер на оваа планета, а Ријана, за жал, го продолжува тој тренд“, напиша друг твитерџија.
Веста за учеството на Деп во шоуто дојде пет месеци по завршувањето на судењето во кое неговата поранешна сопруга Амбер Херд беше обвинета за клевета.
Во 2018 година, две години по разводот со Деп, Херд во коментар за Вашингтон пост напишала дека била жртва на семејно малтретирање. По шестнеделна судска битка, поротата одлучи дека Херд мора да му плати на Деп 15 милиони долари поради тврдењата дека тој физички и сексуално ја нападнал во повеќе наврати.
Модното шоу на Savage X Fenty треба да се емитува на Амазон Прајм на 9 ноември.
