Рускиот претседател Владимир Путин од економски форум во Владивосток испрати закани дека ќе го прекине снабдувањето со енергенси, ако се воведат ограничувања на цените на рускиот гас и нафта.
Тој, во свој стил, предупреди дека западните земји ќе останат „замрзнати како опашката на волкот во познатата руска бајка“.
Според него, европските повици за ограничување на цените на рускиот гас се „глупави“ и ќе доведат до повисоки цени на енергенсите во светот и економски проблеми во Европа.
– Нема да испорачаме ништо ако тоа се коси со нашите интереси, во овој случај економски. Ниту гас, ниту нафта, ниту јаглен… Ништо, рече Путин .
Г7 го објави планот минатата недела, а потегот исто така може да ја ограничи способноста на Русија да обезбеди танкери во земји надвор од Унијата.
– Русија ќе се повлече од договорот за снабдување доколку Западот спроведе план за ограничување на цените. Нема да извезуваме ништо ако тоа е спротивно на нашите интереси, рече Путин.
Претходно, Путин рече дека кратковидните постапки на западните власти ја поттикнале инфлацијата во светот, но во Руската федерација постои тенденција за нејзино намалување. Според него, до крајот на годината стапката на инфлација може да достигне 12 отсто.
Познато е дека Русија е втор најголем извозник на нафта по Саудиска Арабија и е најголем извозник на гас и жито, а, Европа увезува 40 отсто гас и 30 отсто нафта од Русија.
