На интернационалниот музички фестивал „Охрид-фест 2023“ кој се очекува да се одржи на 2 септември, меѓу учесниците ќе биде и популарната српска пејачка Гоца Тржан, како и младиот поп-пејач Стефан Здравковиќ, попознат како Принц од Врање кого го паметиме по годинешниот настап на српскиот Избор на песна за Евровизија, кој за жал не успеа да се пласира за евровизиското шоу.
На охридскиот фестивал, Гоца и Принц од Врање ќе се претстават со песната „Мирно“, потпишана од Душан Бачиќ и од Дејан Николиќ.
– Македонија има богата музичка традиција и љубов кон уметноста, верувам дека ќе нè пречека и ќе нè испрати со голема радост. Со оглед на тоа што сум родум од Врање, македонската музика, за мене, уште од дете, е доста блиска, мила и позната. Татко ми знаеше да ми ја пее „Зајди, зајди јасно сонце“, а јас потоа станав навистина голем обожавател на легендарниот Тоше Проески – вели Принц од Врање.
