Родната куќа на легендарниот пејач Тома Здравковиќ во Печеневци, кај Лесковац, ќе биде обновена и зачувана како дел од неговото наследство.
Веста ја соопштија претставниците на семејството Здравковиќ, кои најавија дека во соработка со градските власти работат на обновување на куќата, но и на иницијатива за подигнување споменик на Тома во Скадарлија.
Куќата во изминатиот период била во многу лоша состојба. Сопругата на Тома, Гордана Гоца Здравковиќ, неодамна откри дека објектот речиси бил пред уривање.
„Бев во Печеневци пред три-четири дена. Сè ќе си дојде на свое место. Таму има многу луѓе кои ќе помогнат да се поправи и среди. Куќата речиси ќе се срушеше. Речиси падна покривот и сè беше во многу лоша состојба, па успеавме колку-толку да ја одржиме“, раскажа таа.
Сепак, според неа, има уште многу работа, а за целосната обнова се потребни и средства.
„Има уште многу да се работи, но немаме ни средства за тоа. Ова што досега е направено го направија луѓето од селото, заедно со момчето што ја води кафеаната. Тој е иницијаторот кој сака куќата повторно да заживее и да остане зачувана“, додаде Гоца.
Гоца претходно изјавила дека желбата на семејството е куќата да му припадне на градот Лесковац, но дека сè уште треба да се заврши документацијата поврзана со наследството.
„Таa куќа треба да му припадне на градот Лесковац, како што се договоривме. Бидејќи документацијата околу наследството сè уште не е средена, постапката трае. Мислам дека тоа ќе се заврши и куќата ќе остане во Лесковац, односно во Печеневци“, рекла таа.
Во меѓувреме, претставниците на семејството работат и на целосно средување на музичкото наследство на Тома. Најавено е комплетирање на неговата дискографија, како и продолжување на активностите за зачувување на неговите песни и авторски права.
Покрај тоа, се работи и на поставување споменик на Тома во Скадарлија, со поддршка од градските власти.
Целта на овие проекти е споменот на Тома Здравковиќ и неговото музичко наследство да останат зачувани и достапни за идните генерации.
