Почина Шинејд О’Конор, ирската пејачка со светска слава – пред десет дена најави нов албум и светска турнеја

од еспресо21:05 - 26 јули, 202321:08 - 26 јули, 2023

Ирската пејачка со светска кариера, Шинејд О’Конор почина на 57-годишна возраст, објави „Дејли мејл“.

Таа стана светска ѕвезда во 1990 година со нејзината легендарна песна на Принс Nothing Compares 2 U. Заедно со оваа песна, таа создаде и други хитови како што се This is the Day, Thank You For Hearing Me, This is a Rebel Song и многу други.

Во текот на нејзината кариера издаде 10 студиски албуми.

Нејзината кариера тргна по нагорна линија по запознавањето на менаџерот Фахтни О’Кели со чија помош го објави и деби албумот „The Lion and the Cobra“ во 1987 година.

Шинејд, која секогаш беше отворена за нејзините проблеми со менталното здравје, на почетокот на овој месец на Фејсбук напиша дека се вратила во Лондон по пауза од 23 години и оти планира да го заврши нејзиниот нов албум и да го промовира на светска турнеја во наредните три години.

О’Конор почина по 17 месеци од смртта на нејзиниот 17-годишен син Шејн кој се самоуби во јануари во 2022 година.

Пејачката која го смени името во Шухада Садакат, кога го прифати исламот во 2018 година, рече дека Шејн бил „светлото во нејзиниот живот“. Во последниот твит објави негова фотографија со порака дека тој бил љубовта на нејзиниот живот и светлост на нејзината душа и оти не се чувствува жива по неговата смрт.

Минатата година беше објавен филм за нејзиниот живот и кариера.